هذه أحاسيس الحزن ومواساة للمأساة من الشاعر الشعبي الكبير / حاكم بن سهل بن سلمه التميمي - من أهالي منطقة دمون - ونسأله تعالى أن يخفف عن المؤمنين شر المعاناة . . وإليكم :
أبديت والمنشأ يهل=وسيول هواشه تشل
والأرض مليانه بظل=والليل تشبه به نهار
======
تشوف الطوارح عالجبال=غطت صحاري مع رمال
والكارثة فوق الخيال=من كبرها عقلي احتار
======
ما شي قمر ما شي نجوم= لا شمس تشرق كل يوم
غير السباله والغيوم = تَرْجُمْ ويزيد الضرار
======
والبرق واصوات الرعود=ما هنيت منه بالرقود
معي الدلائل والشهود = كثر السهر ألقى آثار
======
طشة غضب ما هو نفوف = زيّد تعب فوق الظروف
ما حد قدر يشرح وصوف= ما حد فلت منه و طار
======
وسيل سر يذلح جسور= وعدم يفتك بالبحور
وردودهم وسط الزحور= يمشون مرة في سبار
======
ياهاجسي شفت العلم = والحصن كله اهتدم
ولعاد رواحل أو غنم=شل المزارع والآبار
======
سار الألم والقى فروع = ما بين قلبي والضلوع
والعين تمطر بالدموع = اليوم ساه صارت دمار
======
نرسل تعازي عبر سيل= ومن قوز ودعنا جحيل
قاهر ما حسبت لغيل = ذاقت كرعه اليوم قار
======
مكسور ضلعه من حروب = ذلحين راحت في الجنوب
ريت اليمن تدعي قلوب = لولا الأمل ماشي إنتظار
======
ياقلب يكفي من حزين = ولعاد تردف بالونين
حكم القدر به مؤمنين = خلك قوي شل بالحذار
======
دمون مبنية بحيد = رافع منه تشوف نيد
ريت اللي راح ماله فيد = يعطيه دبل رب القدار
======
وختمت بالهادي الحبيب = هوء دواء جروحي والطبيب
يالله عسى المنشأ يطيب= وينبت لنا أفضل شجار